ថ្ងៃចន្ទ ទី២៤ ខែសីហា ឆ្នាំ២០១៥ ម៉ោង ១០:០៦
ខេត្តព្រះសីហនុ ៖ លោក កែវ ឡាយ ប្រធានមន្ទីរអប់រំ យុវជន និងកីឡាខេត្ត បានឱ្យដឹងតាមទូរស័ព្ទនៅព្រឹកថ្ងៃទី២៤ សីហា នេះថា នៅក្នុងសម័យប្រឡងសញ្ញាបត្រមធ្យមសិក្សាទុតិយភូមិ (សញ្ញាបត្របាក់ឌុប) ចាប់ផ្តើមនៅថ្ងៃទី២៤/២៥ សីហា ២០១៥ សម្រាប់ខេត្តព្រះសីហនុ មានបេក្ខជននិងបេក្ខនារីមកចូលរួមប្រឡងសរុបចំនួន១.៥៧៣នាក់ ហើយចែកចេញជា៣មណ្ឌលប្រឡង គឺ ១-មណ្ឌលវិទ្យាល័យ ហ៊ុន សែន មិត្តភាព ២-មណ្ឌលអនុវិទ្យាល័យកម្មករ និង៣-មណ្ឌលវិទ្យាល័យក្រុង ចែកចេញជា៦៤បន្ទប់ ។
លោកប្រធានមន្ទីរខេត្ត បានបន្តថា នៅក្នុងកម្មវិធីនៃវិញ្ញាសាប្រឡងមណ្ឌលវិទ្យាល័យ ហ៊ុន សែន មិត្តភាព និងមណ្ឌលប្រឡងវិទ្យាល័យក្រុង បេក្ខជនបេក្ខនារី មណ្ឌលខាងលើ ប្រឡងលើវិញ្ញាសាវិទ្យាសាស្ត្រ ចំណែកមណ្ឌលអនុវិទ្យាល័យកម្មករប្រឡងលើវិញ្ញាសាមុខវិជ្ជាសង្គម ។
លោក កែវ ឡាយ បានបញ្ជាក់ថា ជាកិច្ចចាប់ផ្តើមបើកវិញ្ញាសាប្រឡងនៅមណ្ឌលវិទ្យាល័យក្រុង ក៏មានការអញ្ជើញចូលរួមជាអធិបតីភាពពីលោក ឈិត សុខុន អភិបាលខេត្ត មន្ត្រីជាអ្នកសង្កេតការណ៍មកពីអង្គភាព ACU និងមន្ត្រីអង្គការសង្គមស៊ីវិលចំនួន១២អង្គការ ចូលរួមត្រួតពិនិត្យហឹបវិញ្ញាសាយ៉ាងល្អិតល្អន់សំដៅពង្រឹង និងលើកស្ទួយគុណភាពអប់រំនៅក្នុងព្រះរាជាណាចក្រកម្ពុជា ។
លោកបានបញ្ជាក់ថា នៅក្នុងសកម្មភាពនៃការប្រឡងទាំង៣មណ្ឌលខាងលើនេះ បានប្រព្រឹត្តទៅដោយរលូន និងមានសណ្តាប់ធ្នាប់ល្អ ដោយបេក្ខជន បេក្ខនារីទាំងអស់ បានអនុវត្តទៅតាមការណែនាំរបស់លោកគ្រូ អ្នកគ្រូ ជាគណៈមេប្រយោគ ជាអនុរក្ស ក៏ដូចជាការណែនាំរបស់លោកប្រធានអប់រំយុវជន និងកីឡាខេត្ត ជាពិសេស គឺការអនុវត្តទៅតាមការណែនាំរបស់ក្រសួងអប់រំ យុវជន និងកីឡា ៕
>>ទទួលបានព័ត៌មានតាមរយៈ KOHSANTEPHEAP OFFICAIL LINE
.jpg)
0 comments:
Post a Comment