from កម្ពុជាថ្មី:នៅព្រឹកថ្ងៃទី១៣ ខែមករា ឆ្នាំ២០១៥ លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា លោកវ៉ាត់ចំរើន អគ្គលេខាធិការ បានដឹកនាំគណៈប្រតិភូ អញ្ជើញទៅគោរពវិញ្ញាណក្ខន្ធ លោក ហែម ថុន ដើម្បីចូលរួមរំលែកមរណទុក្ខយ៉ាងក្រៀមក្រំ ចំពោះក្រុមគ្រួសារ ក៏ដូចជាសហព័ន្ធកីឡាហែលទឹក។
លោក ហែម ថុន បានទទួលមរណភាពកាលពីល្ងាចថ្ងៃទី១២ ខែមករា ដោយរោគាពាធក្នុងអាយុ៧៦ឆ្នាំ។ លោកប្រធានអូឡាំពិក បានសម្តែងនូវក្តីសោកស្តាយធំធេងបំផុត ដែលបាត់បង់នូវធនធានកីឡាដ៏សំខាន់នេះ ដោយលោកបានចាត់ទុកថា ជាការបាត់បង់នូវធនធានមនុស្សដ៏គួរសោកស្តាយបំផុត ក្នុងពេលអតីតកីឡាករហែលទឹកជម្រើសជាតិជើងចាស់រូបនេះ និងបច្ចុប្បន្នជាអគ្គលេខាធិការរងសហព័ន្ធកីឡាហែលទឹក និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានបូជាមួយជីវិតរបស់លោក ដើម្បីកីឡា។
ក្នុងនាមជាអ្នកឈ្នះមេដាយក្នុងទសវត្ស៦០ លោកក៏ជាអ្នកមានស្នាដៃធំធេងដែរសម្រាប់ពេលបច្ចុប្បន្ន ជាក់ស្តែងក្នុងការសាងសង់មជ្ឈមណ្ឌលកីឡាហែលទឹកតេជោសែនខេត្តកំពង់ចាម ដែលមិនទាន់បានបញ្ចប់នៅឡើយ លោកបានខិតខំខ្លាំងដោយទៅពិនិត្យការសាងសង់ជាប្រចាំ។
រំលឹកពីប្រវត្តិលោកហែម ថុន គឺជាអ្នកហែលទឹក ដ៏ល្បីល្បាញមួយរូបដែរ កាលពីជំនាន់ទសវត្សឆ្នាំ៦០នោះ។ ក្រោយសម័យប៉ុល ពតលោកបានវិលត្រឡប់មកទីក្រុងភ្នំពេញវិញហើយចូលរួមជាមួយវិស័យកីឡាក្នុងស្ថាប័នរដ្ឋ និងប្រឡូកក្នុងកីឡាហែលទឹក ក្នុងនាមជាគ្រូបង្វឹកបន្តទៀត រហូតទទួលបានតួនាទីជាថ្នាក់ដឹកនាំក្នុងសាលាកីឡា ជាអគ្គលេខាធិការសហព័ន្ធកីឡាហែលទឹក ហើយនៅពេលចូលនិវត្តន៍លោកនៅតែអ្នកគ្រប់គ្រងក្នុងសហព័ន្ធហែលទឹក និងជាអគ្គលេខាធិការរងគណៈកម្មាធិការជាតិអូឡាំពិកកម្ពុជារហូតដល់សព្វថ្ងៃ។
មុនពេលទទួលមរណភាពលោកហែម ថុន បានធ្លាក់ខ្លួនឈឺជាទម្ងន់នៅថ្ងៃទី១៧ធ្នូ។ លោកបានក្អកធ្លាក់ឈាម និង បន្ទោបង់ធ្លាក់ឈាមយ៉ាងច្រើន ហើយបានចូលព្យាបាលក្នុងមន្ទីរពេទ្យម្តងរួចមកហើយក្នុងមន្ទីរពេទ្យកាល់ម៉ែតក្រុងភ្នំពេញ។ ស្ថានភាពសុខភាពរបស់លោក បានធូរស្បើយនិងបានចេញពីមន្ទីរពេទ្យមកវិញ។
ក្រោយពីចេញពីមន្ទីរពេទ្យវិញនោះ លោកហែម ថុន មិននៅស្ងៀមទេ ហេតុតែធ្លាប់ជាមនុស្សនិយមនិងខ្វាយខ្វល់នឹងការងារ លោកក៏បានមកធ្វើសន្និសីទកាសែតនិងរៀបចំការប្រកួតហែលទឹកពានរង្វាន់យុវជនលើកទី៦ ដែលទើបបញ្ចប់កាលពីថ្ងៃទី៨ ខែមករាកន្លងមកមកនេះ ធ្វើឲ្យជំងឺរើឡើងវិញ ហើយបានចូលសម្រាកព្យាបាលនៅមន្ទីរពេទ្យកាល់ម៉ែតជាលើកទី២នាថ្ងៃអាទិត្យទី១១ ខែមករា។ ដោយសារសភាពជំងឺមានលក្ខណៈធ្ងន់ធ្ងរមិនសង្គ្រោះបាន លោកហែម ថុន បានទទួលមរណភាពនៅវេលាម៉ោង៥ល្ងាចថ្ងៃច័ន្ទទី១២ ខែមករា ឆ្នាំ២០១៥នេះ៕
.jpg)
0 comments:
Post a Comment