tuyrieminfo

Monday, July 11, 2016

ស្តាប់សំដីរបស់ជនសង្ស័យ ឈ្មោះ ជួប សម្លាប់ ជុំវិញការបាញ់សម្លាប់លោក កែម ឡី (មានវីដេអូ)

រាជធានីភ្នំពេញ៖ ក្រោយអំពើឃាតកម្មបាញ់សម្លាប់លោក កែម ឡី នាវេលាប្រមាណម៉ោង១០ព្រឹក ថ្ងៃទី១០ ខែកក្កដា ឆ្នាំ២០១៦ នៅចំណុចស្តារម៉ាត ស្តុបបូគោ។ សមត្ថកិច្ចបានធ្វើការឃាត់ខ្លួនជនសង្ស័យម្នាក់ មានឈ្មោះ ជួប សម្តាប់ ដោយរូបគេបានសារភាពថា បាញ់សម្លាប់លោក កែម ឡី ដោយសារតែរឿងជំពាក់លុយចំនួន៣០០០ដុល្លារមិនសង។

ប៉ុន្តែទោះជាយ៉ាងណា សមត្ថកិច្ចមិនទាន់អះអាងថា ការសារភាពរបស់ជនសង្ស័យជាការពិត ឬយ៉ាងណានោះឡើយ។ សមត្ថកិច្ចបន្តធ្វើការស្រាវជ្រាវ និងស៊ើបអង្កេតលើករណីនេះបន្ថែម ដើម្បីរកការពិត។
From:Khmernote.com

ចិន ប្រាប់អាមេរិកឲ្យប្រយ័ត្នសម្តី

Unknown8:03 PMNo comments

រដ្ឋមន្ត្រីការបរទេសចិន បានប្រាប់ត្រង់ៗទៅកាន់រដ្ឋមន្ត្រីការបរទេសអាមេរិក ដោយមិនត្រូវធ្វើអ្វីដែលប៉ះពាល់ដល់អធិបតេយ្យភាពរបស់ចិន និងសន្តិសុខនៅសមុទ្រចិនខាងត្បូងនោះទេ។ ការឆ្លើយឆ្លងរបស់ប្រមុខការទូតទាំងពីរ ធ្វើឡើងនៅមុនពេលដែលតុលាការមជ្ឈត្តការអន្តរជាតិ ប្រកាសសាលក្រមលើក្ដីរឿងបណ្ដឹងរបស់ហ្វីលីពីន ពាក់ព័ន្ធនឹងជម្លោះសមុទ្រចិនខាងត្បូង។

ក្រសួងការបរទេសចិន និយាយនៅថ្ងៃទី៦ ខែកក្កដា ថា ប្រមុខការទូតលោក វ៉ាង យី បាននិយាយដោយឥតលាក់លៀមរឿងបញ្ហាសមុទ្រចិនខាងត្បូង ទៅកាន់សមភាគីអាមេរិកលោក ចន ឃែរី។ ក្នុងកិច្ចសន្ទនាតាមទូរសព្ទលោក វ៉ាង យី ប្រាប់លោក ឃេរី ថា អាមេរិកគួររក្សាសន្យារបស់ខ្លួន ក្នុងការរក្សាជំហរកណ្ដាល និងមិនកាន់ជើងភាគីណាមួយនោះទេ។

ឆ្លៀតពេលនោះ ប្រមុខការទូតចិន បានបង្ហាញក្ដីសង្ឃឹមថា អាមេរិកនឹងនិយាយស្ដី និងធ្វើសកម្មភាពប្រយ័ត្នប្រយែងជាងមុន និងមិនធ្វើអ្វីដែលប៉ះពាល់ផលប្រយោជន៍ចិននោះឡើយ។ ទន្ទឹមនឹងនេះ លោក វ៉ាង យី ក៏បញ្ជាក់ជំហររបស់ចិន ដែលបដិសេធទទួលការសម្រេចរបស់តុលាការអន្តរជាតិ ដោយលោកអះអាងថា តុលាការ គ្មានយុត្តាធិការលើករណីនេះទេ។

រដ្ឋមន្ត្រីការបរទេសចិន បានប្រាប់ប្រមុខការទូតអាមេរិកទៀតថា បើទោះជាតុលាការសម្រេចយ៉ាងម៉េចក៏ដោយ ចិននៅតែការពារដាច់ខាតអធិបតេយ្យដែនដីរបស់ខ្លួន ក៏ដូចជាសេរីភាពនាវាចរណ៍ស្របច្បាប់ផងដែរ។ មិនតែប៉ុណ្ណោះ ចិន នឹងការពារសន្តិភាព និងស្ថិរភាពនៅសមុទ្រចិនខាងត្បូងផងដែរ។ នេះក៏ដោយសារតែ ជារឿយៗ ចិនតែងបន្ទោសអាមេរិក ជាអ្នកធ្វើឲ្យជម្លោះសមុទ្រចិនខាងត្បូង ក្ដៅឡើងរហូតមក។

តាមកិច្ចសន្ទនាទូរសព្ទដែលផ្ដើមដោយលោក ឃែរី លោក វ៉ាង យី បន្តថា ទំនាក់ទំនងចិន និងអាមេរិក ស្ថិតលើផ្លូវត្រូវ ហើយភាគីទាំងពីរ គួរតែបន្តកិច្ចសហប្រតិបត្តិការជាមួយគ្នា ហើយដោះស្រាយភាពខុសគ្នាជំនួសវិញ។ ចិនមិនសប្បាយចិត្តទេ នៅពេលដែលនាវាអាមេរិក ធ្វើដំណើរទៅសមុទ្រចិនម្ដងៗ ហើយចាត់ជាការរំលោភបំពានចិនផងដែរ។

ជាមួយគ្នានេះដែរ បើតាមទីភ្នាក់ងារព័ត៌មាន Reuters ក្រសួងការបរទេសអាមេរិក បញ្ជាក់ថា លោក ឃែរី ពិតជាហៅទូរសព្ទទៅលោក វ៉ាង យី មែន។ លោកស្រី Gabrielle Price អ្នកនាំពាក្យក្រសួងការបរទេសអាមេរិក និយាយថា លោក ឃែរី និងលោក វ៉ាង យី ជជែកគ្នាលើផលប្រយោជន៍រួមគ្នា ប៉ុន្តែមិនបានបញ្ជាក់ច្បាស់ពីព័ត៌មានលម្អិតនោះទេ។

សូមបញ្ជាក់ថា មជ្ឈត្តការនៃតុលាការអន្តរជាតិក្រុងឡាអេ ប្រទេសហូឡង់ នឹងប្រកាសសាលក្រមដែលប្តឹងដោយហ្វីលីពីនប្រឆាំងចិន នៅថ្ងៃទី១២ ខែកក្កដា ខាងមុខ។ បើទោះបីជា គេមិនទាន់ដឹងថាភាគីណាឈ្នះក៏ដោយ ប៉ុន្តែមតិភាគច្រើនសន្និដ្ឋានថា ហ្វីលីពីន មានប្រៀបជាង ក្នុងនីតិវិធីច្បាប់ជាលក្ខណៈឯកតោភាគីមួយនេះ៕
From:thmey thmey.com

លោក ម៉ម សូណង់ដូ ប្រកាន់ជំហរធ្វើបាតុកម្ម ទោះបីជាអាជ្ញាធរមិនអនុញ្ញាត

Unknown7:48 PMNo comments

ភ្នំពេញ៖ ប្រធានគណបក្សសំបុកឃ្មុំសង្គមប្រជាធិបេតយ្យលោក ម៉ម សូណង់ដូ នៅតែប្រកាន់ ជំហរធ្វើបាតុកម្មដោយសន្តិវិធី នៅទីលានប្រជាធិបតេយ្យ ដើម្បីស្នើឲ្យអង្គភាពប្រឆាំងអំពើពុករលួយដកពាក្យបណ្តឹង និងការចោទប្រកាន់ទៅលើមន្ត្រីអង្គការសង្គមស៊ីវិលចំនួន ៤ រូប និងអគ្គលេខាធិការរង គ.ជ.ប ចំនួន ១រូប។

លោក ម៉ម សូណង់ដូ នឹងធ្វើបាតុកម្មដោយសន្តិវិធី នៅថ្ងៃទី០៩ កក្កដា ឆ្នាំ២០១៦ ខាងមុខ បើទោះបីជាអាជ្ញាធរសាលារាជធានីភ្នំពេញមិនអនុញ្ញាតឲ្យក្រុមលោកជាង ២០០នាក់ ជួបជុំ នៅទីលានប្រជាធិបតេយ្យ ដើម្បីស្វែងរកយុត្តិធម៌ជូនមន្ត្រីអង្គមិនមែនរដ្ឋាភិបាលក្តី។

ប្រធានគណបក្សសំបុកឃ្មុំសង្គមប្រជាធិបេតយ្យរូបនេះ បានថ្លែងប្រាប់ក្រុមអ្នកសារព័ត៌មាន ពីជំហរលោកថា លោកគ្រាន់តែការពារផលប្រយោជន៍សាធារណៈប៉ុណ្ណោះ តែសាលារាជធានី ភ្នំពេញពុំអនុញ្ញាត ក្រោមហេតុផលថា ប៉ះពាល់សន្តិសុខ សុវត្ថិភាព និងសណ្តាប់ធ្នាប់សាធារណៈ តាមមាត្រា ៩ នៃច្បាប់ស្តីពីបាតុកម្មដោយសន្តិវិធី និងលិខិតបទដ្ឋានគតិយុត្តិនានារបស់ក្រសួងមហាផ្ទៃ ។«យើងអត់ប្រឆាំងគេបានទេ បើមិនឲ្យក៏មិនឲ្យទៅ តែខ្ញុំនៅតែរក្សាជំហរដដែល អ្វីដែលខ្ញុំទាមទារ។ ខ្ញុំចង់ឲ្យបន្ធូរបន្ថយឲ្យពួកគាត់នៅក្រៅឃុំមក បើមិនបានដោះលែងទេ»។ លោក ម៉ម សូណង់ដូ អះអាងជំហរដាច់ខាត ក្រោយកិច្ចប្រជុំសុំច្បាប់អនុញ្ញាតជាមួយអាជ្ញាធរពាក់ព័ន្ធ នៅសាលារាជធានីភ្នំពេញ កាលពីថ្ងៃទី៦ ខែកក្កដានេះ។

លោកបានបន្តការពារហេតុផលដែលលោកបាតុកម្មទាំងងឿងឆ្ងល់ថា កន្លងមក កញ្ញា ខុម ចាន់តារាទី បានស្នើឲ្យសង្គមស៊ីវិលជួយ តែនាងបែរជាប្តឹងបុគ្គលិកអង្គការមិនមែនរដ្ឋាភិបាល ទៅវិញ។

តែយ៉ាងណា អាជ្ញាធរសាលារាជធានីភ្នំពេញ បញ្ជាក់ថា ក្នុងករណីលោក ម៉ម សូណង់ដូ នៅតែប្រកាន់ជំហរធ្វើបាតុកម្មហើយប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ និងរបៀបរយសាធារណៈនោះ ពួកគេត្រូវទទួលខុសត្រូវទាំងស្រុងចំពោះមុខច្បាប់។

ពាក់ព័ន្ធនឹងសំណូមពររបស់លោក ម៉ម សូណង់ដូ នេះ អនុប្រធានអង្គភាពប្រឆាំងអំពើពុករលួយ លោក ឃាង សេង អះអាងថា ACU ពុំអាចធ្វើតាមសំណើលោក ម៉ម សូណង់ដូ ឡើយ។ លោកបានលើកហេតុផលប្រាប់លោក ម៉ម សូណង់ដូ និងអាជ្ញាធរថា ACU គ្រាន់តែជានគរបាលយុត្តិធម៌ក្នុងការសែ្វងរភស្តុតាងដាក់បន្ទុកជនល្មើសប៉ុណ្ណោះ ដោយឡែកការចោទប្រកាន់ជាសមត្ថកិច្ចរបស់អយ្យការអមសាលាដំបូងរាជធានីភ្នំពេញ៕

កម្ពុជាកំពុងងាកទៅរកការគ្រប់គ្រងរបៀបកុម្មុយនិស្ត

Unknown7:38 PMNo comments

ក្រុមអ្នកស្រាវជ្រាវសង្គមនៅក្នុងប្រទេសកម្ពុជា បានមើលឃើញពីដំណើរដើរថយក្រោយយ៉ាងធ្ងន់ធ្ងរនៃការអនុវត្តនៃលទ្ធិប្រជាធិបតេយ្យកម្ពុជា នៅគ្រាដែលគ្រឹះស្ថានអប់កម្រិតឧត្ដមសិក្សាមួយចំនួនបានហាមឃាត់មិនឲ្យមានសកម្មភាពនយោបាយ។

ពួកគេថ្លែងថា ការរឹតត្បិតនេះកំពុងតែទាញប្រទេសកម្ពុជាឲ្យត្រឡប់ទៅរបបកុម្មុយនិស្តដែលអនុវត្តនៅកម្ពុជាក្នុងទសវត្សរ៍១៩៨០ ហើយការរឹតត្បិតនេះនឹងធ្វើឲ្យពលរដ្ឋកម្ពុជាបញ្ឈប់ការឃ្លាំមើលសកម្មភាពទុច្ចរិតរបស់មន្ត្រីរដ្ឋាភិបាលមួយចំនួន ដែលសម្ងំសន្សំប្រមូលទ្រព្យសម្បត្តិ ដោយការប្រព្រឹត្តអំពើពុករលួយ។

លោក ហេង ស្រ៊ាង អ្នកសិក្សាស្រាវជ្រាវសង្គម បានប្រាប់ VOA កាលពីខែមិថុនាថា អ្នកនយោបាយគណបក្សគ្រប់គ្រងប្រទេសមានការបារម្ភថា ការគាំទ្ររបស់ខ្លួនធ្លាក់ចុះ ដោយសារតែការបណ្ដោយឲ្យមានការពិភាក្សាគ្នាអំពីរឿងនយោបាយនៅតាមគ្រឹះស្ថានអប់រំដោយសេរី ទើបអ្នកនយោបាយគណបក្សគ្រប់គ្រងប្រទេសប្រឹងធ្វើគ្រប់បែបយ៉ាងរារាំងសិស្សនិស្សិតមិនឲ្យផ្តោតអារម្មណ៍លើរឿងនយោបាយ ឬធ្វើសកម្មភាពនយោបាយ។

លោកថ្លែងថា អ្នកនយោបាយគណបក្សកាន់អំណាចត្រូវធ្វើការវិភាគលើចំណុចខ្សោយរបស់ខ្លួនក្នុងការធ្វើនយោបាយ ដែលមិនបានទាញសំឡេងគាំទ្រច្រើន តែបែរជាបានធ្វើឲ្យបាត់បង់សំឡេងគាំទ្រខ្លួនទៅគណបក្សប្រឆាំងវិញ។

«សំខាន់បំផុតចំពោះខ្ញុំគឺគណបក្សគ្រប់គ្រងអំណាចហ្នឹង គាត់គួរតែគិតថា តើហេតុអ្វីបានជាប្រជាពលរដ្ឋច្រើនទៅៗ បោះឆ្នោតប្រឆាំងនឹងខ្លួន ហើយទីពីរហេតុអី បានជាពេលមានបញ្ហាសំខាន់ៗ ប្រជាពលរដ្ឋហ្នឹង គេមិនសូវឲ្យគណបក្ស អាជ្ញាធររបស់ខ្លួនឯងនៅក្នុងមូលដ្ឋាន ជួយដោះស្រាយបញ្ហាទេ បែរទៅប្ដឹងសង្គមស៊ីវិល ឬក៏ស្វះស្វែងរកមធ្យោបាយពីអង្គការអន្តរជាតិផ្សេងៗ។ អញ្ចឹងវាប្រហែលមានបញ្ហាអីសំខាន់ហើយ»។

ក្រសួងអប់រំ យុវជន និងកីឡានៃរាជរដ្ឋាភិបាលកម្ពុជា កាលពីខែសីហា ឆ្នាំ២០១៥ បានចេញសេចក្តីណែនាំស្តីពីការទប់ស្កាត់សកម្មភាព ឬការឃោសនានយោបាយនៅតាមគ្រឹះស្ថានសិក្សាសាធារណៈ និងគ្រឹះស្ថានសិក្សាឯកជន។ សេចក្តីណែនាំនោះបានបញ្ជាក់ពីទោសទណ្ឌ ប្រសិនមានការធ្វើសកម្មភាពនយោបាយដោយគ្មានការអនុញ្ញាតពីក្រសួងអប់រំ យុវជន និងកីឡា។ នៅក្នុងផ្នែកខ្លះនៃសេចក្តីណែនាំដដែលនោះបានឲ្យដឹងថា៖

«គ្រប់សកម្មភាពនយោបាយ ឬការឃោសនានយោបាយឲ្យគណបក្សនយោបាយណាមួយនៅក្នុងស្ថាប័នអប់រំ ឬគ្រឹះស្ថានសិក្សាដែលផ្ទុយនឹងមាត្រា៣៤នៃច្បាប់នេះ ត្រូវទទួលពិន័យអន្តរការណ៍ជាប្រាក់ចំនួន១លានរៀល (ឬប្រមាណជា២៥០ដុល្លារ)ទៅ៥លានរៀល (ឬប្រមាណជា១.២៥០ដុល្លារ)។ ...ចំពោះនីតិបុគ្គលត្រូវទទួលពិន័យអន្តរការណ៍ជាប្រាក់ពី ១០ លានរៀល (ឬ ប្រមាណជា២.៥០០ដុល្លារ) ទៅ២០លានរៀល (ឬប្រមាណជា៥.០០០ដុល្លារ)»។

សេចក្តីណែនាំដដែលនេះបានឲ្យដឹងថា កន្លងមកក្រសួងអប់រំបានសង្កើតឃើញថា នៅតាមគ្រឹះស្ថានសិក្សាទាំងសាធារណៈ ទាំងឯកជន មានសមាគម អង្គការ បុគ្គលិកអប់រំ និងគ្រូបង្រៀនជាប់កិច្ចសន្យាមួយចំនួនបានធ្វើសកម្មភាពមិនប្រក្រតី ដោយបានធ្វើការផ្សព្វផ្សាយបោះឆ្នោតជ្រើសរើសថ្នាក់ដឹកនាំរបស់សមាគម អង្គការទាំងនោះ និងឃោសនាបំផុសគំនិតឲ្យបុគ្គលិកអប់រំចូលរួមសកម្មភាពជាមួយខ្លួន។

សមាគម អង្គការខ្លះបានបង្កើតឲ្យមានជាសាខានៅតាមគ្រឹះស្ថានសិក្សា ទាំងសាធារណៈ ទាំងឯកជន ព្រមទាំងធ្វើសកម្មភាពជ្រៀតជ្រែកការងារអប់រំថែមទៀតផង។ សកម្មភាពទាំងនេះបានធ្វើឲ្យប៉ះពាល់ដល់សណ្តាប់ធ្នាប់ក្នុងគ្រឹះស្ថានសិក្សាដែលផ្ទុយនឹងគោលការណ៍អព្យាក្រិត្យភាពរបស់គ្រឹះស្ថានសិក្សា ជាពិសេសផ្ទុយពីច្បាប់ស្តីពីការអប់រំ។

លើសពីនេះទៅទៀត នៅគ្រាដែលស្ថានភាពនយោបាយកំពុងតានតឹងនេះ គ្រឹះស្ថានអប់រំមួយចំនួនក៏ត្រូវគេដឹងថា បានហាមមិនឲ្យមានការចោទសួរសំណួរពាក់ព័ន្ធនយោបាយនៅក្នុងកម្មវិធីជួបជុំក្រុមនិស្សិត និងមន្ត្រីរបស់រដ្ឋាភិបាលផងដែរ។

ការរឹតបន្តឹងនេះត្រូវក្រុមអ្នកសង្កេតការណ៍នយោបាយឲ្យដឹងថា បានកើតឡើង បន្ទាប់ពីវប្បធម៌សន្ទនានៃគណបក្សប្រជាជនកម្ពុជា និងគណបក្សសង្គ្រោះជាតិជួបការប្រេះស្រាំ និងស្របពេលដែលរដ្ឋាភិបាលដឹកនាំដោយគណបក្សប្រជាជនកម្ពុជាមានការព្រួយបារម្ភជ្រុលហួសហេតុអំពីការផ្ទុះឡើងនៃបដិវត្តន៍ពណ៌។

និស្សិតម្នាក់ឈ្មោះគង់ រ៉ៃយ៉ាត្រូវបានតុលាការក្រុងភ្នំពេញសម្រេចដាក់គុករយៈពេល១៨ខែកាលពីខែមីនាកន្លងទៅ ក្រោយពេលនិស្សិតរូបនេះសរសេរអំពីការចង់ធ្វើបដិវត្តន៍ពណ៌ដើម្បី «ការផ្លាស់ប្ដូរសម្រាប់សង្គមខ្មែរ»។

លោកកែម ឡី អ្នកវិភាគសង្គម បានប្រាប់ VOA ថា ការបន្តរារាំងមិនឲ្យនិយាយរឿងនយោបាយនៅតាមគ្រឹះស្ថានអប់រំ បានទាញដំណើរការអនុវត្តលទ្ធិប្រជាធិបតេយ្យឲ្យដើរថយក្រោយ។

លោកថ្លែងថា ការណ៍នេះនឹងផ្ដល់ប្រយោជន៍ដល់ក្រុមអ្នកនយោបាយ ដែលមានចិត្តលោភលន់ បន្តការកសាងទ្រព្យរបស់ខ្លួន ប៉ុន្តែប្រជាពលរដ្ឋខ្មែរបានត្រឹមតែចាកចោលស្រុក សម្រុកទៅធ្វើការនៅបរទេស។

«ប៉ុន្តែប្រជាពលរដ្ឋហ្នឹងគឺចំណាកស្រុកច្រើនទៅ ក្រក៏ច្រើនទៅ បញ្ហាចោរលួច ចោរប្លន់ ចោរគាស់ផ្ទះ ឃាតកម្ម គ្រឿងញៀនអីក៏ច្រើនទៅ។ អញ្ចឹងវឹកវរនៅក្នុងសង្គមដូចបច្ចុប្បន្នអញ្ចឹង»។

លោកឲ្យដឹងបន្ថែមថា គណបក្សប្រជាជនកម្ពុជាបានហាមឃាត់មិនឲ្យមនុស្ស ដែលមិនស្របតាមគោលនយោបាយរបស់ខ្លួន ធ្វើសកម្មភាពនយោបាយនៅគ្រឹះស្ថានអប់រំទេ តែសកម្មជនគណបក្សនេះបានធ្វើការយ៉ាងផុសផុលក្នុងការកៀងគរមនុស្សម្នារឲ្យមកគាំទ្រខ្លួន នៅតាមគ្រឹះស្ថានអប់រំទៅវិញ។

«បើសិនជាយើងជ្រុលថា បិទទាល់តែយើងបិទទាំងអស់គ្នា រឿងនៅក្នុងសាលារៀន នៅក្នុងអីហ្នឹង។ ...រដ្ឋមន្ត្រីរបស់គណបក្សប្រជាជនកម្ពុជាហ្នឹងកុំយកវេទិកាហ្នឹងទៅនិយាយរឿងនយោបាយដែរ នៅក្នុងសាលារៀន ហើយយើងកុំចូលរួមបង្កើតសមាជិកគណបក្ស ជានិស្សិតៗហ្នឹង ជាសមាជិករបស់គណបក្សនៅក្នុងសាលារៀន។ កុំឲ្យមានបណ្តាញគណបក្សនៅក្នុងសាលារៀន។ អាហ្នឹងបានវាត្រូវស្មើភាពគ្នា»។

ទោះណាជាមានការរិះគន់ពីក្រុមអ្នកស្រាវជ្រាវ និងអ្នកវិភាគសង្គមអំពីការគាបសង្កត់សិទ្ធិធ្វើនយោបាយនៅគ្រឹះស្ថានអប់រំយ៉ាងនេះក្តី លោកសុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងការពាររដ្ឋាភិបាលថា មិនបានរំលោភលើសិទ្ធិពលរដ្ឋក្នុងការប្រើសិទ្ធិនយោបាយនោះទេ។

«អាហ្នឹងរឿង រឿងលោកគ្រូទាល់តែខ្លួនគាត់។ គាត់យល់ឃើញយ៉ាងម៉េច ដូចជាគាត់ចង់ប្រមូលផ្គុំសតិអារម្មណ៍កូនសិស្ស គាត់ឲ្យប្រមូលទៅរៀនតាមចំណេះវិជ្ជា ដែលមានក្នុងក្របខណ្ឌកម្មវិធីសិក្សា។ បើសិនណាជាកូនសិស្សមកនិយាយរឿងនយោបាយ វាខុសពីកម្មវិធីសិក្សារបស់គាត់ អាហ្នឹងគាត់ម៉េចនឹងអនុញ្ញាត»។

លោកបញ្ជាក់ថា គណបក្សគ្រប់គ្រងប្រទេសពុំមានបំណងដឹកនាំប្រទេសដោយខ្លួនឯង ដោយមិនឲ្យមានសំឡេងពីក្រុមអ្នកនយោបាយជំទាស់ ដូចដែលប្រទេសកុម្មុយនិស្តបានធ្វើនោះដែរ។

«វាមិនមែនមួយបក្សទេ អាហ្នឹង! សភាមានពីរបក្ស បើគាត់មិនចូល អាហ្នឹងរឿងគាត់តើ? ពីព្រោះគាត់ចូលស្បថ ចូលកាន់តំណែងតាំងពីខែ៥ ខែ៦ ខែ៧ ខែ៨ ឆ្នាំ២០១៤មក។ ពេលដែលប្រជុំហ្នឹងគឺថា សម្ដេចប្រធានសភាតែងតែអញ្ជើញគ្រប់តំណាងរាស្ត្រទាំងអស់ឲ្យចូលរួម។ បើគាត់មិនចូលរួម អាហ្នឹងបានសេចក្ដីថា សិស្សរត់ចោលសាលាទេ មិនមែនសាលាបិទទ្វារមិនឲ្យគាត់ចូលទេ»។

ឆ្លើយតបទៅនឹងការលើកឡើងអំពីការកសាងសមាជិកគណបក្សប្រជាជនកម្ពុជានៅតាមគ្រឹះស្ថានអប់រំ លោកសុខ ឥសាន អ្នកតំណាងរាស្ត្រគណបក្សកាន់អំណាច បានពន្យល់ថា៖

«កុំឲ្យគាត់និយាយ បើឃើញគេធ្វើខុសច្បាប់ ឲ្យគាត់ប្តឹងទៅ! អាហ្នឹងវាមានតែផ្លូវហ្នឹងទេ។ បើដើរនិយាយទេ អាហ្នឹងគឺថា វាផ្សែងក្នុងផ្សែង ក្នុងពពកអញ្ចឹង អាហ្នឹងយកជាការមិនបានទេ។ យើងចាត់ទុកជាការឃោសនាមួលបង្កាច់។ អញ្ចឹងទេ បើគាត់មានភស្តុតាងច្បាស់លាស់ ឲ្យគាត់ប្តឹងទៅ»។

ជាមួយគ្នានេះដែរ លោកសុខ ទូច សាកលវិទ្យាធិការនៃសាកលវិទ្យាល័យខេមរៈ បានមានប្រសាសន៍ថា គ្រឹះស្ថានឧត្ដមសិក្សារបស់លោកមិនបានហាមមិនឲ្យនិស្សិតនិយាយពីនយោបាយនោះទេ។

ភ្នំពេញ៖ ជាង២៥ឆ្នាំក្រោយការបញ្ចប់ការដឹកនាំប្រទេសតាមរបបនយោបាយកុម្មុយនិស្ត រដ្ឋាភិបាលកម្ពុជាបច្ចុប្បន្នត្រូវក្រុមអ្នកវិភាគសង្កេតឃើញថា បានព្យាយាមទាញប្រទេសខ្លួនឲ្យវិលទៅរករបបនយោបាយកុម្មុយនិស្ត ដែលមិនផ្ដល់តម្លៃដល់ការបញ្ចេញមតិ។

លោកបញ្ជាក់បន្ថែមថា ប្រសិនបើមិនឲ្យនិយាយពីរឿងនយោបាយ កម្ពុជាមិនចាំបាច់មានការបោះឆ្នោតរើសតំណាងរាស្ត្រនោះឡើយ។

«អានេះ ជាសង្គមប្រជាធិបតេយ្យ។ វាមិនអាចមិនឲ្យនិយាយបញ្ហានយោបាយទេ។ មិនឲ្យនិយាយនយោបាយ កុំបោះឆ្នោតទៅ។ បើយើងបោះឆ្នោត យើងត្រូវតែមានហើយនយោបាយ។ គណបក្សនេះមានគោលនយោបាយម៉េច មានវប្បធម៌អាម៉េច អីម៉េច។ យើងវាអត់អាចទៅបាន [អញ្ចឹង] ទេ»។

ប្រទេសកម្ពុជាត្រូវគេដឹងថា បានដើរចាកចេញពីរបបកុម្មុយនិស្ត បន្ទាប់ពីទទួលបានការជួយជ្រោមជ្រែងពីប្រទេសដែលភាគច្រើនកាន់យករបបប្រជាធិបតេយ្យ ក្នុងការចុះកិច្ចព្រមព្រៀងសន្តិភាពនាទីក្រុងប៉ារីសកាលពីឆ្នាំ១៩៩១។

ក៏ប៉ុន្តែរដ្ឋាភិបាលបច្ចុប្បន្នត្រូវអ្នកវិភាគនយោបាយពណ៌នាថា បានបង្ខិតខ្លួនទៅកៀកនឹងប្រទេសចិនកុម្មុយនិស្ត និងមិនសូវមានភាពស្និទ្ធស្នាលជាមួយបស្ចិមប្រទេស ដែលផ្ដល់តម្លៃដល់សិទ្ធិក្នុងការនិយាយស្តីនោះឡើយ៕

សប្បាយក្លាយជាទុក្ខ ! បាត់បង់កូនប្រុសម្នាក់យ៉ាងអាណោចអាធ័ម បន្សល់ទុកតែវិប្បដិសារី

Unknown7:24 PMNo comments

ខេត្តព្រះសីហនុ ៖ គ្រួសារមួយបាននាំកូនៗទៅលេងកំសាន្តនៅមាត់សមុទ្រ ត្រង់ចំណុចឆ្នេរអតីតដំណាក់ស្តេច តែដោយសារតែការធ្វេសប្រហែសបណ្ដោយឲ្យកូនប្រុសចុះលេងទឹកតែម្នាក់ឯងបណ្ដាលឲ្យកូនប្រុសម្នាក់លង់ទឹកស្លាប់យ៉ាងអាណោចអាធ័ម ។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៥ និង១០នាទីល្ងាច ថ្ងៃទី០៦ ខែកក្កដា ឆ្នាំ២០១៦ នៅចំណុចឆ្នេរអតីតដំណាក់ស្តេច ស្ថិតក្នុងក្រុមទី១៧ ភូមិ៤ សង្កាត់លេខ៤ ក្រុងព្រះសីហនុ ។

សមត្ថកិច្ចមូលដ្ឋាន បានឲ្យដឹងថា ក្មេងប្រុសរងគ្រោះ ឈ្មោះ យូ ហ៊ឹង ភេទប្រុស អាយុ១១ឆ្នាំ ជនជាតិវៀតណាម មានឪពុកឈ្មោះ ហៃ យូ ភេទប្រុស អាយុ៣៨ឆ្នាំ ម្តាយឈ្មោះ យៀង ស្រី អាយុ២៩ឆ្នាំ ស្នាក់នៅផ្ទះជួល៧ជាន់ ខាងលិចរោងចក្រញ៉ូវស្តារ ស្ថិតក្នុងភូមិ១ សង្កាត់លេខ១ ។

យោងតាមប្រភពសាក្សីនៅក្បែរកន្លែងកើតហេតុបានឲ្យដឹងថា នៅមុនកើតហេតុ ក្មេងប្រុសរងគ្រោះបានអណ្តែតពោងលេងទៅកាន់ទឹកជ្រៅជាមួយប្អូនប្រុសម្តងរួចមកហើយ ប៉ុន្តែត្រូវអ្នកទេសចរណ៍ម្នាក់ដែលជាទាហានជើងទឹកហែលទៅសង្គ្រោះយកមកកាន់ឆ្នេរដោយសុវត្តិភាព ប៉ុន្តែដោយការធ្វេសប្រហែសពីឪពុកម្តាយពុំបានឲ្យក្មេងប្រុសរងគ្រោះឡើងលើគោកវិញទេ គឺយកតែកូនប្អូន ឯកូនបងគឺនៅលេងពោងដដែល មួយសន្ទុះក្រោយមករលកសមុទ្របានបោកបក់ពោងក្មេងប្រុសរងគ្រោះទៅម្តងទៀត ហើយក៏បានលិចទៅក្នុងទឹកបាត់ ទើបឪពុកម្តាយភ្ញាក់ផ្អើលឆោឡោនាំគ្នារាវរក តែរកពុំឃើញនោះទេ រហូតរយៈពេលជាងកន្លះម៉ោងក្រោយបានឃើញក្មេងប្រុសរងគ្រោះអណ្តែតឡើងវិញនៅចម្ងាយពីកន្លែងលិចជិត១០០ម៉ែត្រ ភ្លាមនោះក៏មានជនបរទេសម្នាក់បានស្ទុះទៅស្រង់ដើម្បីយកមកជួយសង្គ្រោះ ប៉ុន្តែអ្វីៗវាហួសពេលទៅហើយ បន្សល់ទុក្ខតែវិប្បដិសារី និង ភាពសោកស្តាយតែប៉ុណ្ណោះ ។

ក្រោយពេលកើតហេតុ ដោយមិនអស់ចិត្តឪពុកម្តាយកបានបញ្ជូនក្មេងប្រុសរងគ្រោះទៅសង្គ្រោះនៅមន្ទីរពេទ្យខេត្តព្រះសីហនុដែរ តែវាហួសពេលបាត់ទៅហើយ ។ ហេតុនេះយោងតាមព្រឹត្តិការណ៍ថ្ងៃនេះ គឺជាមេរៀនមួយសម្រាប់ឪពុកម្តាយទាំងអស់ដែលបាននាំកូនចៅមកលេងសមុទ្រ នាខែវស្សា សូមកុំបណ្តោយឲ្យកូនលេងទឹកតែម្នាក់ឯងឲ្យសោះ ៕

From:Kohsantepheapdaily.com

លោកបារ៉ាក់ អូបាម៉ា ចេញជួយឃោសនាលោកស្រីគ្លីនតុន

Unknown6:35 PMNo comments

ប្រធានាធិបតីអាមេរិកលោកបារ៉ាក់ អូបាម៉ា បានចេញជួយឃោសនាបោះឆ្នោតរួមជាមួយលោកស្រីហ៊ីលឡារី គ្លីនតុន ជាលើកដំបូងកាលពីថ្ងៃទី៥ កក្កដា ។

ក្នុងអង្គមីទ្ទីងឃោសនាមួយនាទីក្រុង CHARLOTTE រដ្ឋការ៉ូលីនខាងជើង លោកបារ៉ាក់ អូបាម៉ា ថ្លែងថា ហ៊ីលឡារី ! ហ៊ីលឡារី! ហ៊ីលឡារី! តើលោកអ្នកមានការកក់ក្តៅដែរទេ? ហេតុអីក៏ខ្ញុំមកជាមួយលោកស្រីហ៊ីលឡារី? នេះក៏មកពីយើងមានការជឿជាក់លើលោកស្រី។ លោកបានសរសើរថាមពល និងភាពក្លាហានរបស់លោកស្រីគ្លីនតុន ដែលធ្លាប់ជាគូប្រកួតជាមួយលោកក្នុងការបោះឆ្នោតសម្រាំងបេក្ខជនប្រធានាធិបតីកាលពីឆ្នាំ២០០៨ ។ លោកថ្លែងទៀតថា ពុំមានបុរស ឬនារីណាដែលមានគុណសម្បត្តិល្អដូចលោកស្រីសម្រាប់កាន់តំណែងប្រធានាធិបតីឡើយ ។ ប្រាកដណាស់ លោកស្រីហ៊ីលឡារី គ្លីនតុន នឹងជានារីរដ្ឋដែលនឹងនាំឱ្យយើងមានមោទនភាពលើពិភពលោក ។

នៅលើវេទិកា ប្រធានាធិបតីអាេមរិកបានលើកឡើងយ៉ាងវែងពីសកម្មភាពរយៈពេល៤ឆ្នាំ ដែលលោកស្រីគ្លីនតុន ធ្វើរដ្ឋមន្ត្រីការបរទេសពោលគឺក្នុងអាណត្តិទីមួយរបស់លោក ។ ពេលនោះលោកស្រីបង្ហាញពីកម្លាំង និងភាពជាអ្នកដឹកនាំ ។

មុននេះលោកស្រីហ៊ីលឡារី គ្លីនតុន បានលើកពីប្រវត្តិនៃទំនាក់ទំនងរបស់លោកស្រីជាមួយលោកបារ៉ាក់ អូបាម៉ា ។ លោកស្រីថា លោកអូបាម៉ា ជាគូប្រជែងខាងនយោបាយ បន្ទាប់មកជាដៃគូ រួចក្លាយជាមិត្ត ។ លោកស្រីបន្តថា ជឿខ្ញុំចុះ ខ្ញុំដឹងពីរបស់២ឬ៣ស្តីពីវិធីយកឈ្នះការបោះឆ្នោត ។

ទាក់ទិនរឿងអីុម៉ែលឯកជនរបស់លោកស្រីហ៊ីលឡារី គ្លីនតុន នាយករបស់ភ្នាក់ងារ FBI អាេមរិក លោក JAMES COMEY ប្រកាសនាថ្ងៃទី៥ កក្កដា ថា ភ្នាក់ងាររបស់លោកនឹងពុំធ្វើអនុសាសន៍ណាមួយឱ្យមានការកាត់ក្តីរបស់តុលាការប្រឆាំងលោកស្រីគ្លីនតុន ទាក់ទិននឹងការស៊ើបអង្កេតលើអីុម៉ែលឯកជនរបស់លោកស្រីឡើយ ៕

From:Kohsantepheapdaily.com

ប្រជាធិបតេយ្យកម្ពុជានឹងដើរថយក្រោយបើលោកខាងលិចផ្ដាច់ជំនួយ

Unknown6:15 PMNo comments

អ្នកជំនាញវិទ្យាសាស្ត្រនយោបាយ លោកបណ្ឌិត ចាន់ វិបុល ក្នុងវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃទី១៤ ខែមិថុនា ឆ្នាំ២០១៦។ Photo: RFA

អង្គការសង្គមស៊ីវិល និងអ្នកតាមដានស្ថានការណ៍នយោបាយ យល់ឃើញថា ដំណើរការប្រជាធិបតេយ្យនៅកម្ពុជា នឹងមិនអាចរីកចម្រើនបានទេ បើសិនជាសហគមន៍អន្តរជាតិសម្រេចកាត់ផ្ដាច់ ឬកាត់បន្ថយជំនួយមែននោះ។ ពួកគេបញ្ជាក់ថា ជំនួយបរទេស ពិសេសជំនួយពីសហរដ្ឋអាមេរិក និងសហភាពអឺរ៉ុប គឺជាដើមទុនក្នុងការកសាងប្រជាធិបតេយ្យ និងនីតិរដ្ឋដ៏រឹងមាំនៅកម្ពុជា។ មន្ត្រីនាំពាក្យគណបក្សកាន់អំណាចទទួលស្គាល់បញ្ហានេះ ប៉ុន្តែថា កម្ពុជាមិនអាចរងសម្ពាធពីខាងក្រៅជុំវិញការអនុវត្តច្បាប់របស់ខ្លួនបានឡើយ។

អង្គការសង្គមស៊ីវិល និងអ្នកវិភាគនយោបាយយល់ឃើញដូចគ្នាថា បើសិនជារដ្ឋាភិបាលនៅព្រងើយកន្តើយចំពោះការគំរាមកាត់ផ្ដាច់ជំនួយពីប្រទេសលោកខាងលិចទៀតនោះ វានឹងរុញច្រានកម្ពុជា ឱ្យក្លាយជាប្រទេសកុម្មុយនិស្តសាជាថ្មី និងបង្កផលវិបាកធ្ងន់ធ្ងរដល់ប្រជាពលរដ្ឋ។ ពួកគេថ្លែងបែបនេះ បន្ទាប់ពីគណៈកម្មាធិការថវិកានៃព្រឹទ្ធសភាអាមេរិក បានអនុម័តសេចក្ដីព្រាងថវិកាមួយកាលពីចុងខែមិថុនា ដែលមានចែងអំពីលក្ខខណ្ឌរឹតបន្តឹងជំនួយ ៧៧,៨លានដុល្លារមកកម្ពុជា សម្រាប់ឆ្នាំ២០១៧ ខាងមុខ ដរាបណារដ្ឋាភិបាលនៅតែបន្តអំពើហិង្សា និងការធ្វើទុក្ខបុកម្នេញលើសកម្មជនសិទ្ធិមនុស្ស និងគណបក្សប្រឆាំងទៀតនោះ។

គណៈកម្មាធិការថវិកានៃព្រឹទ្ធសភាអាមេរិក បានបង្ហាញក្ដីបារម្ភរបស់ខ្លួនជុំវិញចំណាត់ការរបស់រដ្ឋាភិបាលកម្ពុជា ទៅលើមន្ត្រីអង្គការសង្គមស៊ីវិល និងគណបក្សប្រឆាំង ហើយថា វានឹងធ្វើឱ្យប៉ះពាល់ដល់ដំណើរការបោះឆ្នោតដោយសេរី និងយុត្តិធម៌នៅឆ្នាំ២០១៧ ខាងមុខ។

លោក សុខ ឥសាន មន្ត្រីនាំពាក្យគណបក្សប្រជាជនកម្ពុជា ដែលជាបក្សដឹកនាំរដ្ឋាភិបាល ប្រតិកម្មថា អាមេរិកមានសិទ្ធិក្នុងការផ្ដល់ ឬមិនផ្ដល់ជំនួយមកឱ្យកម្ពុជា ពីព្រោះខ្លួនជាម្ចាស់ជំនួយ។ លោកឆ្លើយតបទៅនឹងក្ដីបារម្ភរបស់គណៈកម្មាធិការថវិកានៃព្រឹទ្ធសភាអាមេរិកថា កម្ពុជាមិនមានការយាយីសកម្មជនសិទ្ធិមនុស្ស និងគណបក្សប្រឆាំងនោះទេ ហើយចំណាត់ការរបស់រដ្ឋាភិបាលកន្លងមក គឺធ្វើឡើងទៅតាមច្បាប់។

អ្នកនាំពាក្យបក្សកាន់អំណាចរូបនេះ ទទួលស្គាល់ថា បើមានការកាត់ផ្ដាច់ជំនួយមែន វានឹងប៉ះពាល់ដល់ដំណើរការនៃការអនុវត្តប្រជាធិបតេយ្យ និងនីតិរដ្ឋនៅកម្ពុជា ប៉ុន្តែលោកថា កម្ពុជាត្រូវអនុវត្តច្បាប់របស់ខ្លួន៖ «យើងទៅតាមដំណើរហ្នឹងទៅ ប្រជាជនកម្ពុជា ធ្លាប់ឆ្លងកាត់ដំណាក់កាលវេទនា មិនមែនត្រឹមថ្ងៃនេះស៊ីបាយទេ ធ្លាប់ស៊ីពោត ស៊ីស្រូវសាលីដែរតើ! តាំងពីឆ្នាំ១៩៧៩ មក។ យើងធ្វើទៅតាមកម្មវិធីគោលការណ៍របស់យើងត្រឹមត្រូវដែលគាំទ្រដោយប្រជាពលរដ្ឋភាគច្រើនលើសលប់។ ចង់មិនចង់ វាប៉ះខ្លះហើយ ក៏ប៉ុន្តែខ្ញុំយល់ថា វាប៉ះខ្លាំង ប៉ះដល់អង្គការក្រៅរដ្ឋាភិបាល និងសង្គមស៊ីវិលមួយចំនួនធំដែលទទួលជំនួយ។ ជាង ៧០លានដុល្លារហ្នឹង ភាគច្រើនបានទៅអង្គការក្រៅរដ្ឋាភិបាលទេ»។

ការឆ្លើយតបរបស់លោក សុខ ឥសាន គឺដូចគ្នាទៅនឹងការប្រកាសរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី១៣ មិថុនា កន្លងទៅដែលថា លោកមិនបារម្ភនឹងការកាត់ផ្ដាច់ជំនួយរបស់សហគមន៍អន្តរជាតិនោះឡើយ។ លោក ហ៊ុន សែន ថ្លែងសំដៅសហភាពអឺរ៉ុប ដែលបានអនុម័តសេចក្ដីសម្រេចមួយដាក់សម្ពាធដល់រដ្ឋាភិបាលកម្ពុជា ដោយព្រមានបង្កកជំនួយអភិវឌ្ឍន៍ ប្រសិនបើមិនមានការដោះលែងសកម្មជនការពារសិទ្ធិមនុស្ស និងបញ្ឈប់ការធ្វើទុក្ខបុកម្នេញគណបក្សប្រឆាំងទេនោះ៖ «អាងអីអាងកាត់ (ជំនួយ) ពេលខ្លះខ្ញុំថា កាត់ៗទៅ! អ្នកដែលងាប់មុនគេ គឺអង្គការក្រៅរដ្ឋាភិបាល អ្នកណាដែលធ្វើការឱ្យអង្គការក្រៅរដ្ឋាភិបាល ស៊ីប្រាក់ខែអង្គការក្រៅរដ្ឋាភិបាលអ្នកហ្នឹងងាប់មុនគេ ព្រោះគេមានផ្ដល់មកឱ្យរដ្ឋាភិបាលពីអង្កាល់»។

បើទោះជាប្រមុខរដ្ឋាភិបាល និងមន្ត្រីគណបក្សកាន់អំណាចព្យាយាមអះអាងបែបនេះក្តី ក៏ការសិក្សាបង្ហាញយ៉ាងច្បាស់ថា ទឹកប្រាក់ទាំងនោះគឺត្រូវផ្ដល់មកឱ្យរដ្ឋាភិបាលកម្ពុជា តាមរយៈកិច្ចសហប្រតិបត្តិការទ្វេភាគី។ ជាឧទាហរណ៍ ទឹកប្រាក់ជំនួយជាង ៤០០លានអឺរ៉ូ ឬស្មើនឹងជិត ៥០០លានដុល្លារអាមេរិក ដែលសហភាពអឺរ៉ុបសន្យាផ្ដល់មកឱ្យកម្ពុជា ពីឆ្នាំ២០១៤ ដល់ឆ្នាំ២០២០ គឺជាជំនួយគាំទ្រដល់ការអនុវត្តគោលនយោបាយអភិវឌ្ឍន៍ជាតិសំខាន់ៗ ជាពិសេសគឺយុទ្ធសាស្ត្រចតុកោណរបស់រាជរដ្ឋាភិបាលកម្ពុជា។ ជំនួយទាំងនោះទ្រទ្រង់សកម្មភាពរបស់រាជរដ្ឋាភិបាលក្នុងវិស័យ ៣សំខាន់ គឺការអភិវឌ្ឍវិស័យកសិកម្ម និងគ្រប់គ្រងធនធានធម្មជាតិ ការផ្ដល់នូវការអប់រំដែលមានគុណភាពល្អប្រសើរ និងការអនុវត្តកំណែទម្រង់រដ្ឋបាល និងអភិបាលកិច្ច ដូចជាកំណែទម្រង់ការគ្រប់គ្រងហិរញ្ញវត្ថុសាធារណៈ កំណែទម្រង់ការអភិវឌ្ឍប្រជាធិបតេយ្យ និងកំណែទម្រង់ការបោះឆ្នោតជាដើម។

ចំពោះជំនួយដែលសហភាពអឺរ៉ុប ផ្ដល់ឱ្យអង្គការសង្គមស៊ីវិលវិញ គឺជាជំនួយផ្ដោតលើកម្មវិធីជាក់លាក់ដែលគ្របដណ្ដប់លើវិស័យមួយចំនួន ដូចជា សិទ្ធិមនុស្ស អភិបាលកិច្ចមូលដ្ឋាន ការប្រែប្រួលអាកាសធាតុ និងការការពារបរិស្ថាន ការអភិវឌ្ឍវិស័យឯកជន និងសមភាពយេនឌ័រ ជាដើម។ ជំនួយទាំងនោះត្រូវបានផ្ដល់ឱ្យអង្គការសង្គមស៊ីវិលតាមរយៈសំណើសុំដែលត្រូវឆ្លងកាត់ការប្រកួតប្រជែង។ បច្ចុប្បន្ន សហភាពអឺរ៉ុបផ្ដល់ជំនួយដល់អង្គការសង្គមស៊ីវិលជាង ៧០ នៅទូទាំងប្រទេស ដែលមានទឹកប្រាក់សរុបជាង ៦០លានអឺរ៉ូ។

ចំណែកឯជំនួយជិត ៨០លានដុល្លាររបស់សហរដ្ឋអាមេរិក នៅពេលនេះវិញ គឺជាជំនួយផ្តោតលើកម្មវិធីសុខភាព ការអភិវឌ្ឍ ជំនួយសម្រាប់ការអប់រំ និងហ្វឹកហ្វឺនយោធា ការប្រឆាំងភេរវកម្ម ការដោះមីន និងកម្មវិធីពាក់ព័ន្ធផ្សេងទៀត។

អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត កត់សម្គាល់ថា ជំនួយរបស់ក្រុមប្រទេសលោកខាងលិច គឺជាជំនួយដែលកម្ពុជា ត្រូវការជាចាំបាច់ដើម្បីកសាងសង្គមឆ្ពោះទៅរកការអភិវឌ្ឍពិតប្រាកដ។ លោកថា ការកាត់ផ្ដាច់ជំនួយណាមួយពីក្រុមប្រទេសទាំងនោះនឹងអាចធ្វើឱ្យកម្ពុជា ធ្លាក់ចុះការអភិវឌ្ឍ ហើយពេលនោះប្រជាធិបតេយ្យ និងការគោរពសិទ្ធិមនុស្សនឹងមិនអាចឈរជើងនឹងបានឡើយ៖ «កុំភ្លេចថា កម្ពុជា ជាប្រទេសដែលប្រកាន់យករបបប្រជាធិបតេយ្យសេរីពហុបក្ស ហើយកម្ពុជា ជាសមាជិកនៃអង្គការ។ កម្ពុជាបានផ្តល់ហត្ថលេខី និងបត្យាប័នទៅលើកតិកាសញ្ញា និងសន្ធិសញ្ញាទាំងឡាយស្តីអំពីសិទ្ធិមនុស្ស ធានាការពង្រឹងលទ្ធិប្រជាធិបតេយ្យនៅកម្ពុជា។ អ៊ីចឹងបើសិនជាម្ចាស់ជំនួយច្រើនត្រូវបានកាត់ផ្ដាច់ នោះកម្ពុជា យើងនឹងអាចជួបវិបត្តិ ហើយដំណើរការលទ្ធិប្រជាធិបតេយ្យនៅកម្ពុជា យើងនឹងធ្លាក់ចុះជាបន្តទៀត»។

ស្រដៀងគ្នានេះ អ្នកជំនាញខាងវិទ្យាសាស្ត្រនយោបាយ និងអភិបាលកិច្ច បណ្ឌិត ចាន់ វិបុល មានប្រសាសន៍ថា រដ្ឋាភិបាលគួរតែយកចិត្តទុកដាក់នឹងជំនួយរបស់បស្ចិមប្រទេស ត្បិតជំនួយទាំងនេះបានធ្វើឱ្យកម្ពុជា អភិវឌ្ឍមកទល់នឹងសព្វថ្ងៃ និងបន្តិចម្តងៗ ពង្រឹងនូវប្រជាធិបតេយ្យ និងអភិបាលកិច្ចល្អនៅក្នុងប្រទេស។

លោកថា ការមិនបារម្ភនឹងជំនួយបរទេសនេះ មិនមែនជាជម្រើសល្អនោះទេ ពីព្រោះវានឹងធ្វើឱ្យមានផលវិបាកផ្នែកសង្គម សេដ្ឋកិច្ច និងនយោបាយ នៅពេលប្រទេសទាំងនោះសម្រេចកាត់ផ្ដាច់ជំនួយមែន៖ «ប្រតិបត្តិការរបស់ស្ថាប័នរដ្ឋមួយចំនួនទៅលើវិស័យសុខាភិបាល កំណែទម្រង់វិមជ្ឈការ និងវិសហមជ្ឈការនឹងត្រូវបានកាត់បន្ថយ។ បើយើងមើលក្នុងវិស័យសេដ្ឋកិច្ច ប្រសិនបើមានការកាត់ជំនួយនេះ ក៏ឈានដល់ការកាត់បន្ថយប្រតិបត្តិការសេដ្ឋកិច្ច និងធុរកិច្ច។ បើកាលណាកាត់បន្ថយប្រតិបត្តិការសេដ្ឋកិច្ចពីប្រទេសមហាអំណាច យើងឃើញថា កម្ពុជានឹងទទួលរងឥទ្ធិពលអំពីប្រតិបត្តិការវិនិយោគដោយផ្ទាល់ពីបរទេសខ្លះដែរ»។

បន្ថែមពីលើនេះ បណ្ឌិត ចាន់ វិបុល ថ្លែងទៀតថា ជំហរតឹងតែងរបស់រដ្ឋាភិបាលកម្ពុជា ជុំវិញជំនួយបស្ចិមប្រទេសនេះ នឹងធ្វើឱ្យខាតបង់ផ្នែកនយោបាយការបរទេស ពីព្រោះវានឹងជំរុញឱ្យមានការកៀរគរគ្នាក្នុងចំណោមប្រទេសមហាអំណាច និងម្ចាស់ជំនួយធំៗ ផ្អាកការផ្ដល់ជំនួយមកកម្ពុជា ថែមទៀត។

លោកជំរុញឱ្យរដ្ឋាភិបាលពិចារណាអ្វីដែលម្ចាស់ជំនួយស្នើឡើង និងដោះស្រាយវិបត្តិទាំងនោះដើម្បីជាផលប្រយោជន៍សម្រាប់កម្ពុជា៖ «តាមរយៈអង្គការសង្គមស៊ីវិលក្ដី រដ្ឋាភិបាលក្ដី ក្នុងការពង្រឹងការយល់ដឹងរបស់ប្រជាជនកម្ពុជា អំពីលទ្ធិប្រជាធិបតេយ្យ សិទ្ធិមនុស្ស ខ្ញុំឃើញទាំងអស់នេះហើយគឺជាលទ្ធផលចេញពីថវិកាដ៏ក្រាស់ក្រែលដែលកម្ពុជា បានទទួលក្នុងរយៈពេលប៉ុន្មានទសវត្សនេះ។ ក៏ប៉ុន្តែបើសិនជាយើងអត់បានធនធានទាំងអស់នេះទេ ការយល់ដឹងអំពីលទ្ធិប្រជាធិបតេយ្យ ការគោរពសិទ្ធិមនុស្សរបស់កម្ពុជា និងការជំរុញឱ្យរដ្ឋាភិបាលមានការទទួលខុសត្រូវខ្ពស់នេះ ខ្ញុំឃើញថា នៅជាដំណើរវែងឆ្ងាយណាស់។ អ៊ីចឹងនេះគឺជាឥទ្ធិពលដ៏វិជ្ជមានមួយ ដោយការប្រើប្រាស់ធនធានពីបរទេសដែលប្រកាន់លទ្ធិប្រជាធិបតេយ្យ ដូចជាសហរដ្ឋអាមេរិក និងសហភាពអឺរ៉ុប»។

មកទល់ពេលនេះ ការព្រួយបារម្ភរបស់អង្គការជាតិ និងអន្តរជាតិ ព្រមទាំងការអំពាវនាវទាំងឡាយរបស់ប្រទេសម្ចាស់ជំនួយ មិនទាន់ត្រូវបានឆ្លើយតបជាវិជ្ជមានណាមួយពីរដ្ឋាភិបាលកម្ពុជា នៅឡើយ។ បញ្ហាទាំងនោះមានជាអាទិ៍ បញ្ឈប់ការធ្វើទុក្ខបុកម្នេញលើសកម្មជនសិទ្ធិមនុស្ស និងគណបក្សប្រឆាំង ធានានូវការគោរពសិទ្ធិមនុស្សពេញលេញ ដែលរួមបញ្ចូលទាំងសេរីភាពនៃការបញ្ចេញមតិ សេរីភាពខាងសមាគម និងសេរីភាពនៃការប្រមូលផ្ដុំ ជាពិសេសការបន្តវប្បធម៌សន្ទនារវាងគណបក្សជាប់ឆ្នោតទាំងពីរ៕

Welcome to visite my news blog

During sharing certificate at DonBosco Scholl

Final exam of students second years

Festive ceremony celebrating the depths of DonBosco Sihanouk ville

Internship at Kqupe.Net

Monday, July 11, 2016

ស្តាប់សំដីរបស់ជនសង្ស័យ ឈ្មោះ ជួប សម្លាប់ ជុំវិញការបាញ់សម្លាប់លោក កែម ឡី (មានវីដេអូ)

Thursday, July 7, 2016

ចិន ប្រាប់អាមេរិកឲ្យប្រយ័ត្នសម្តី

លោក ម៉ម សូណង់ដូ ប្រកាន់ជំហរធ្វើបាតុកម្ម ទោះបីជាអាជ្ញាធរមិនអនុញ្ញាត

កម្ពុជាកំពុងងាកទៅរកការគ្រប់គ្រងរបៀបកុម្មុយនិស្ត

សប្បាយក្លាយជាទុក្ខ ! បាត់បង់កូនប្រុសម្នាក់យ៉ាងអាណោចអាធ័ម បន្សល់ទុកតែវិប្បដិសារី

លោកបារ៉ាក់ អូបាម៉ា ចេញជួយឃោសនាលោកស្រីគ្លីនតុន

ប្រជាធិបតេយ្យកម្ពុជានឹងដើរថយក្រោយបើលោកខាងលិចផ្ដាច់ជំនួយ

Labels

Blog Archive

Download

Labels

Definition List

WEB DEVELOPMENT

facebook

Categories

Khmer Proverb

FREE VECTORS

google.com

CORPORATE WEB DESIGN