រាជធានីភ្នំពេញ ៖ បេក្ខជន៣នាក់វគ្គផ្តាច់ព្រ័ត្រនៃកម្មវិធីខេមបូឌៀន អាយដល ម្នាក់ពីខេត្តស្វាយរៀង ម្នាក់ពីខេត្តកំពង់ធំ និងម្នាក់ទៀតពីខេត្តបាត់ដំបង សុទ្ធតែមានការគាំទ្រពីមហាជនដូចគ្នា ហើយមហាជនខ្លះទស្សន៍ទាយថា អ្នកនេះ ខ្លះថាអ្នកនោះ ប៉ុន្តែជាក់ច្បាស់គឺបេក្ខជន នី រតនា ពីខេត្តកំពង់ធំ ជាម្ចាស់ពានរង្វាន់ ។ ការប្រកួតចម្រៀងវគ្គផ្តាច់ព្រ័ត្រនេះ កាលពីរាត្រីថ្ងៃអាទិត្យទី១ ខែវិច្ឆិកា ឆ្នាំ២០១៥ ក្រោមការចូលរួមជាកិត្តិយសពីលោកខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកជំទាវ ។
ក្នុងរាត្រីនោះ ទស្សនិកជនច្រើនកុះករចូលរួមទស្សនា និងបោះឆ្នោតគាំទ្រតាមរយៈការផ្ញើសារតាមទូរស័ព្ទចំពោះបេក្ខជនដែលគេពេញចិត្ត ។ វគ្គផ្តាច់ព្រ័ត្ររដូវកាលទី១ នៃកម្មវិធីខេមបូឌៀន អាយដលនេះមានបេក្ខជន៣រូប ជាជើងខ្លាំង គឺលោកនី រតនា ពីខេត្តកំពង់ធំ, លោកម៉ៅ ហាជី មកពីខេត្តបាត់ដំបង និងលោកសៅ ឧត្តម ពីខេត្តស្វាយរៀង ។ វគ្គចុងក្រោយនេះបេក្ខជនទាំង៣រូប ត្រូវច្រៀងបទបែបមនោសញ្ចេតនាម្នាក់២បទ បែបញាក់កន្ត្រាក់អារម្មណ៍១បទ និងបទមនោសញ្ចេតនាច្រៀងរួមគ្នា១បទ ។ ពួកគេខំប្រឹងបញ្ចេញទេពកោសល្យ រៀងៗខ្លួនជូនទស្សនិកជនវាយតម្លៃ និងបោះឆ្នោតគាំទ្រ ។
បន្ទាប់ពីការបញ្ចេញទេពកោសល្យរបស់បេក្ខជនចប់ហើយនោះ ការបោះឆ្នោតតាមទូរស័ព្ទចាប់ផ្តើម ដោយខាងអ្នករៀបចំកម្មវិធីបញ្ជាក់ជូនអ្នកទស្សនាថា បេក្ខជនដែលគណៈកម្មការលើកសរសើរមិនមានន័យថាល្អទាំងស្រុងទេ គឺស្ថិតនៅលើសំឡេងមហាជនជាអ្នកកំណត់។ បើយល់ថាបេក្ខជនណាល្អនោះ មហាជនអាចផ្ញើសារគាំទ្រដើម្បីឱ្យបានទទួលជ័យលាភី ។
ទីបំផុតពិធីករលោកជា វិបុល ប្រកាសលទ្ធផលផ្តល់ជ័យលាភីចំពោះបេក្ខជននី រតនា ធ្វើឱ្យម្ចាស់ខ្លួនត្រេកអរឥតឧបមា ។ បេក្ខជននី រតនា ជាម្ចាស់ពានរង្វាន់រដូវកាលទី១នៃកម្មវិធីខេមបូឌៀន អាយដល នេះ បានធ្វើឱ្យគណៈកម្មការក៏ដូចជាទស្សនិកជនចាប់អារម្មណ៍ជាបន្តបន្ទាប់ ដោយសារតែគេបានវិវឌ្ឍខ្លួនល្អទៅតាមទម្រង់នៃបទចម្រៀង ព្រមទាំងត្រងត្រាប់ការពន្យល់ណែនាំពីរបៀបច្រៀងរបស់រៀមច្បង ។ ទោះបីជាប្រភេទបទអ្វីក៏ដោយក៏លោកនី រតនា តស៊ូហាត់រៀនច្រៀងឱ្យទាល់តែបានសម្រេច ។ កន្លងមកនៅលើវេទិកានី រតនា ប្រមូលអារម្មណ៍ច្រៀងបានល្អ ចេះដាក់មនោសញ្ចេតនាតាមប្រភេទបទ ទាំងបទមនោសញ្ចាតនា ទាំងបទញាក់ ធ្វើឱ្យអ្នកទស្សនាស្រឡាញ់ពេញចិត្ត ។ អ្វីដែលទស្សនិកជនជក់ចិត្តខ្លាំងបំផុត គឺនៅវគ្គពាក់កណ្តាលផ្តាច់់ព្រ័ត្រលោកនី រតនាស្រែកច្រៀងបទ «ស៊ូឃ្លាត» ដែលជាបទតឹង បូករួមទាំងបទមួយចំនួនទៀតក៏ច្រៀងបានល្អ ។ ចាប់តាំងពីពេលនោះមកប្រជាប្រិយភាពរបស់លោកនី រតនា កាន់តែឡើងខ្ពស់ ហើយទទួលជ័យជម្នះនៅវគ្គផ្តាច់ព្រ័ត្រ ។
លោកនី រតនា ទទួលបានប្រាក់រង្វាន់១០០លានរៀល ពីម្ចាស់កម្មវិធីខេមបូឌៀន អាយដល និងបានរង្វាន់ពីក្រុមហ៊ុនខារ៉ាបាវ២.៥០០ដុល្លារ ។ ក្រៅពីរង្វាន់ទាំងនោះនី រតនាក្លាយជាតារាចម្រៀងចុះកិច្ចសន្យាជាមួយផលិតកម្មហង្សមាស ។ ដោយឡែកបេក្ខជន២រូបទៀត គឺលោកម៉ៅ ហាជី និងលោកសៅ ឧត្តម ដែលមិនទទួលបានជ័យលាភីទទួលបានប្រាក់រង្វាន់ពីអគ្គនាយកទូរទស្សន៍ហង្សមាស លោកឧកញ៉ាអឹុង សុខងួន ១.០០០ដុល្លារ ក្នុងម្នាក់ និងរង្វាន់ពីអ្នកឧបត្ថម្ភកម្មវិធីគឺក្រុមហ៊ុនខារ៉ាបាវ ក្នុងម្នាក់២.០០០ដុល្លារ ៕
.jpg)
